Aumentado Nailad ni Toloy Evasco Kabahin sa Special Orders ni Quirog

KABAHIN SA GIPAGAWAS NI GOBERNADOR ARIS AUMENTADO NGA SHOW CAUSE ORDER NGADTO KANG PROVINCIAL AGRICULTURIST LIZA MIGRINO QUIROG, KANHI CHIEF OF STAFF NI CONGRESSMAN EDGAR CHATTO SA IYANG TERMINO ISIP GOVERNADOR SA BOHOL KANIADTONG 2010 – 2019. 

Human ang paglabay sa 72 ka oras nga gitagana sa Gobernador Aumentado ngadto kang Liza Quirog aron sa pagtubag sa iyang pasangil ngadto sa babayeng Hepe sa Buhatan sa Provincial Agriculture sa Bohol, gipakita ni Quirog ang iyang kopya sa Special Orders No. 124 nga matud pa sa Gobernador dili tinuod kay walay kopya sa Malacanang segun sa report ni former Cabinet Secretary Leoncio “Toloy” Evasco. 

Si Evasco nangayo og certification sa Malacanang Records Office nga nag ingon nga wala silay kopya sa maong Special Orders No. 124 ug nikumbinsi kang Gobernor Aris Aumentado nga namakak si Quirog sa iyang pagsulti nga aduna siya mando nga magtuon sa Command and General Staff Course sa Armed Forces of the Philippines isip opisyal sa Reserve Command sa Philippine Army. 

Matod pa ni Liza Quirog, ang naghatag sa Special Orders mao ang General Headquarters sa Armadong Kusog sa Pilipinas kaniadtong Marso 2022 ug dili ang Office of the President sa Malacanang. Wala ba kaha mamumo si Evasco ug si Aumentado sa maong pamahayag sa Provincial Agriculturist nga maoy Commanding Officer sa mga Army Reservists sa Bohol? Morag nahimong ignorante sa pagpadagan sa kagamhanan ang kanhi Cabinet Secretary ug ang kasamtangang Gobernador sa Bohol. 

Unsay naka aghat sa kanhi Cabinet Secretary nga maoy chairman sa OGAR sa Capitolyo sa pagpangayo og Certification sa Malacanang kaniadtong Junio 2023. Dugay naman diay kaayo gikuha ni Evasco ang maoy certification. Buot pasabot ani, walay labot sa panghitabo sa pagbisita ni Vice President Sara Duterte kaniadtong September 5, 2023 sa Bohol ang pagpagawas sa SHOW CAUSE ORDER ni Aumentado ngadto kang Quirog. 

Mahinumduman nato nga si Evasco usab kinsa maoy nagdala sa buhatan sa OGAR o Office of Governance, Accountability and Review sa Kapitolyo, mao usab ang nagpasaka og sumbong batok kang Dr. Larry Pamugas ang Assistant sa buhatan ni Quirog sa Office of the Provincial Agriculturist. Tungod niini, nag atubang karon ug kaso diha sa Regional Trial Court sa Tagbilaran City batok kang Aumentado aron pagdeklarar nga usa ka iligal ug unconstitutional ang maong buhatan nga OGAR segun sa decision sa Supreme Court kaniadto. 


Ang memorandum ni Aumentado kang Quirog naghisgot usab nga ang nahisgotang Special Orders maoy nakapa-aghat kaniya sa pag aprobar sa hangyo nga siya temporaryo nga madestino sa AFP Education Training and Doctrine Command sa Camp Aguinaldo. Apan segun sa pagpatin-aw ni Quirog, siya nagsulti nga ang gipasabot sa maong special orders mao ang mando sa Chief of Staff sa AFP nga si General Centino ngadto kaniya ug dili ang pagpangayo og permiso sa Gobernador nga siya adto mo duty sa Camp Aguinaldo aron magtuon sa Command and General Staff Course. Mao man gani nga mangayo siya og Authority to Travel ug Travel Reimbursements sa matag higayon nga siya moadto sa Camp Aguinaldo sa Quezon City sa Manila alang sa mga face-to-face nga kalihukan sa pagtuon. 

Naunsa na man diay ta ani? Lisud ba diay sabton ang mga pulong nga inenglis sa Special Orders No. 124 nga wala man magkadimao ang Memorandum sa Show Cause Order sa Gobernador ngadto kang Quirog?

Sumpay sa maong Show Cause Order Memorandum ni Aumentado ngadto kang Quirog, naghisgot nga ang Hepe sa Buhatan sa Office of the Provincial Agriculturist nga nahimong Scholar sa nagka lainlaing nasud ug ahensya sa goberno, naka supak sa iyang Scholarship Contract gikan sa September 2019 – September 2020, tungod kay siya nagpa enrol balik sa pagtuon bisan pa nga wala pa mahuman ang iyang Scholarship Contract sa Kapitolyo nga unta magpabilin ug dili mohawa sa maong ahensya sulod sa duha ka tuig human sa iyang graduation sa kurso nga Master in National Security Administration. 

Nag-ingon si Quirog nga wala siya maka supak sa maong Scholarship Contract nga natapos kaniadtong Oktubre 2022, segun sa pasangil ni Aumentado tungod kay wala siya mobiya sa kapitolyo bisan pa sa iyang pagtuon sa CGSC nga On-line lamang sa pipila ka buwan sugod sa Marso 2022. Sa laing bahin, ang memorandum nga gipagawas ni Aumentado kaniadtong August 1, 2022 ngadto ni Quirog maoy nagsugo kaniya nga maggahin sa iyang tibuok oras sa adlaw-adlaw ngadto sa iyang pagtuon sa CGSC. 

Bisan pa man nga gihukasan siya sa iyang trabaho isip Hepe sa buhatan sa Office of the Provincial Agriculturist apan wala siya mohawa sa Capitolyo. Busa, dili siya pwede nga pasanginlan nga nakasupak sa Scholarship Contract sa goberno tungod kay ang gobernador mismo maoy nagsugo kaniya ug wala siya mohawa sa iyang buhatan ug labaw sa tanan, aduna siyay Travel Authority sa tanang panahon nga siya miadto sa Camp Aguinaldo aron sap ag-apil sa face-to-face sessions sa pagtuon sa CGSC. 

Kung paninawon nato si Liza Quirog sa iyang mga pamahayag, dakong tamparos ngadto Aumentado ug ni Evascom ug makapangutana kita kung unsa ba gayud ang katuyuan sa memorandum ni Governor Aumentado ngadto sa babayeng hepe sa buhatan sa Provincial Agriculturist? Sama ba kini sa gibuhat sa iyang administrasyon ngadto kang Dr. Larry Pamugas nga gisuspenso sa duha ka bulan, apan human sa maong panghitabo, wala nay gidungog kung unsa na ang nigawas nga resulta sa Investigation sa Provincial Legal Officer nga si Handel Lagunay ngadto sa lalaking hepe sa buhatan sa Office of the Provincial Agriculturist kaniadto? Motuo ba kita sa mga huhungihong nga kini propaganda lang 

Mao ba kaha usab ang dangatan ni Liza Quirog sa umaabot nga mga adlaw, nga kini suspensohon usab sa Gobernador tungod sa pasangil niini nga namakak sa iyang Special Order No. 124 segun sa certification nga gipangayo ni Leoncio “Tuloy” Evasco? Aduna bay tinuod nga basehanan sa ilang mga pasangil? Unsay kalainan sa Malacanang Records Office ug sa AFP, Camp Aguinaldo?

Unsa man gyud ang anaa sa maong buhatan sa Office of the Provincial Agriculturist nga anaa man nakatutuk ang mga politikanhong pagpanggukod sa administrasyon sa Kapitoyo karon? Ang pagpasaka sa mga kaso ug sumbong, aduna ba kiniy mahimong tabang aron molambo ang probinsya ug ang katawhang Bol-anon? Nakatabang ba kini pagpa us-os sa presyo sa bugas? Ningbarato ba ang presyo sa isda ug gasoline? 

Leave a Comment