Bohol Board Member Balite Nabitik sa Lit-ag nga Tsismis?

BY VEN REBO ARIGO

TSISMIS ra gyod ang pasangil nga may opisyal nga pulitikong nakadawat og P5M protection money gikan sa usa ka reseller sa repa scam.

Kini sumala karon sa repa admin nga si Zel Libranza, kinsa ginganlan ni Board Member (BM) Victor Balite nga iyang tinubdan sa paghimog niyag samang pasangil sa iyang privilege speech sa Sangguniang Panlalawigan (SP) niadtong Martes.

PAGSUBAY SA MIAGI ARON MAS MASABOT

Kon kahinumduman, sa nauna niyang pamahayag sa facebook kay daghan na ang naningil sa repa, gisukmatan ni Zel ang usa ka reseller nga si Angela kon asa ang kuwarta nga iya kunong gibilin sa naulahi aron iuli sa mga buyers.

Nialegar si Zel nga si Angela niingon kaniya nga di mabalaka kon dakpon siya (Zel) kay “modupa” kaniya si BM Ricky Masamayor kay “gihatagan” niya (Angela) og P5M.

Pulos taga-Loon sila si Zel, Angela ug Masamayor.

Sa facebook ra gipunit ni Balite ang “ebidensiya” sa pasangil nga iyang gipabuto kunohay sa privilege speech.

Ginganlan ni Balite si Zel apan wa si Masamayor.

Pero sa samang sesyon sa SP, way panaganang gikonprontar ni Masamayor si Balite nga “ako may imong gipasabot.”

Nipasabot si Masamayor kalabot sa maong estorya nga nagduhig sa iyang ngalan ug wa na matud pa nitingog si Balite.

Si Angela niadto na diay mismo kang Masamayor sa bay sa naulahi aron ihimakak ang pasangil ni Zel nga niingon kuno siya nga iyang gihatagag P5M ang board member.

Ang pag-adto ni Angela sa bay sa board member gikumpirmar mismo ni Masamayor. (Naa koy gi-save nga text sa board member nga nag-confirm niini.)

Si Angela nag-post og screenshot sa akusasyon ni Zel kaniya kay naglagot siya nga “gigamit” ang iyang ngan. Nihulga siyag kaso batok kang Zel.

ESTORYA RA GYOD DIAY

Sa bag-ong pamahayag ni Zel pinaagi sa video nga gi-forward sa usa ka source nganhi kanako kagabii, gipuntarya na sab ni Zel si Angela nga matud niya maoy iyang gibinlan sa kuwarta sa repa nga wa nauli ngadto sa mga buyers ug bisan sa ubang resellers.

Dugang nitirada si Zel kang Angela: “Ingon-ingon ka nga madam kon mouli ka ayaw kabalaka kay naay pulitikong modupa nimo. Ingon ka nga naa pod kay bayran og P5M nga pulitiko ug P2M sa CIDG. Pero estorya ra diay to! Imo kong giunay!”

Tsismis ra gyod diay! Hastang CIDG naapil diay sa ampaw nga estorya.

‘MO-RESIGN KO KON MAY EBIDENSIYA SI BALITE’

“Mo-resign ko sa pagka-board member kon makapamatuod si Balite bisag gamay lang nga ebidensiya,” pintok ug direktang namahayag sa radyo si Masamayor.

Si Zel giingong nagtrabaho sa Hong Kong, apan may wa nakumpirmar nga taho nga posibleng nakauli na kini sa Pilipinas.

Matud ni Masamayor, iya ganing gisugyot nga imbitahon sa law enforcement agencies sama sa PNP-CIDG ug NBI si Zel aron personal nga makapatin-aw.

PRIVILEGE SPEECH NA POD
UG ANG CIDG ANG IG-A

Aron di modayag nga gisakyag pulitika ang kaguliyang sa repa at the expense of the innocent like Masamayor, angay nga mo-privilege speech pod si Balite ug this time nganlan ang CIDG aron iya pong ipaimbestigar sa SP.

Puwedeng imbestigaron sa iya mismong komiteba—-Committee on Good Government sa SP—ug this time nganlan niya ang CIDG bisag wa gihapon siyay ebidensiya gawas sa tsismis sa pesbok.

Apan sumala sa insider sa SP, dunay mga complaints sa panagbangi gikan sa pipila ka mga LGUs nga gisang-at sa iyang komiteba nga wa gani aksyoni o resolbaha. Kon tinuod, duna pila na ka tuig nga pending gihapon sa komiteba ni Balite.

NGANONG WA NGANLI?

Kay lagi nagbasi sa pesbok, gilitok ni Balite sa SP session ang ngan ni Zel isip basehanan ug ang kunohay protection money, apan wa niya nganli ang opisyal nga iyang giigo ug ipaimbestigar.

Kinsa man ang opisyal nga tawgon sa imbestigasyon nga wa man nganli Balite? Manghunaw siya kay wa siyay ginganlan apan iyang giinsistir ang tsismis sa pesbok? Palagnas basta magduda lang ang publiko sa kadagkuan sa Kapitolyo ning panahon sa pulitika? Fishing expedition motivated by politics gamit nga paon ang tsismis?

Nahadlok si Balite kay tsismis? Kay siya mismo way kamatuoran? Apan nganong iya mang gilugos og “paukyab” sa sesyon sa SP nga wa gani una nisusi kang Masamayor bisag kortesiya na lang kay kauban man sila sa SP—ug mao pa gani ang ilang Floor Leader sa Hunta Probinsiyal?

Si Balite nangisog sa pag-privilege speech apan nahadlok pagngan sa iyang giakusar. Si Masamayor wa nagpanuko sa pagnawong kang Balite nga siya maoy gipasabot. Kinsay nahadlok kanila sa kamatuoran?

PREPARADO UG SAKTO UNTA

Si Balite sakop sa labawng balay-balaoranan sa lalawigan. Sa di pa ang privilege speech sa seryosong akusasyon, tun-an ang isyo ug maghipos una og lig-ong ebidensiya aron inig-arangkada sa imbestigasyon ang resulta dili pop corn nga humay.

Posibleng may nagsolsol kang Balite nga maayo sakyan ang tsismis bahalag di tinuod basta magduda lang ang publiko sa kadagkuan sa Kapitolyo nga kontra nila sa pulitika.

Gani mao ni ang panglingla nga gikatag karon sa fake news sa social media ug intriga sa iresponsableng media.

Si Balite giingong maoy “last-minute” nga napunit aron ipares isip bise ni Kong. Aris Aumentado batok kang reelectionist Vice Gov. Rene Relampagos, kansang ig-agaw asawa ni Masamayor.