By VEN C. ARIGO
Nasulbad ang problema ug kahasol sa mga pasaherong molarga pagawas sa Bohol agi sa pantalan sa Tagbilaran City taliwa sa pandemya.
Gitaho ni Provincial Board Member Jade Bautista nga sugod karong adlawa, aduna nay Philippine Coast Guard (PCG) personnel sa tiketan sa OceanJet aron mo-stamp agig pagmatuod nga legitimate ang papel sa negative RT-PCR or antigen test result sa pasahero ug sayon na lang ang paglukat og tiket sa barko. Synchronized na ang proseso sa mga papel ug tiket.
Kaniadto, ang pasahero moadto una sa Coast Guard sa sud sa pantalan ug mobalik sa gawas sa pantalan aron molukat og tiket sa OceanJet. Mosulod na usab siya sa pantalan for check-in. Sa pagsulod sa pantalan, mo-log in ang pasahero kalabot sa basic info protocol. Samtang naa na sa sulod, aduna na poy i-fill up nga form sa samang information para na usab sa boarding.
Hasol kaayo ilabina sa mga pasaherong edaran o adunay balatian nga kinahanglan pang palakaw-lakawon pasulod ug pagawas sa pantalan uwan man o init.
Ang good news nga di na magbalik-balik og lakaw ang pasahero gitaho ni Bautista human sa joint meeting sa Committee on Tourism, Committee on Health andPublic Sanitation ug Committee on Peace and Order sa Sangguniang Panlalawigan (SP) ganihang buntag.
Kini human usab sa privilege speech ni Bautista sa SP session sa niaging semana.
Giaksyonan dayon ang daghang reklamo.
Uban kang Bautista, kinsa chairperson sa tourism committee ug vice chairperson sa health committee, sa miting sila si Board Members Molex Cepedoza, Elpedio Bonita ug Ricky Masamayor.
Nagpasalamat sila sa daling aksyon sa PCG, Philippine Ports Authority (PPA), Philippine National Police (PNP-Maritime) ug OceanJet Corp.
Nitambong sa joint meeting sila si
PCH CO Edzel B. Gonzaga ug PO1 Paul Vincent Yu, PPA – SPPI Greg T. Dela Cruz, PNP Maritime Officer Hans Ericson Casocot ug Oceanjet Dep Supervisor Roel Maboloc.
Ang isyo unang nakakuha sa atensyon human gi-post ni Benjie Oliva, Bol-anon nga kanhi administrator sa Cooperative Development Authority ug karon aktibo sa partylist Koop Kampi.