DYRD-Bohol Chronicle Nanikas sa Paggamit sa Ngalan ni Duterte

TIKAS NGA PAGGAMIT SA NGAN SA PRESIDENTE

Napatik sa page ni Journalist Ven Rebo Arigo: SALAWAYONG sumbanan ug pagbudhi ngadto sa pagsalig sa mga tawo ang pagtuis sa kamatuoran sa mata sa publiko.

Bisan og dili tigsimba, ang way grado apan tarong mahadlok nga mohimo niini.

Kini ilabina kon ang paglubag sa matuod gitumong sa paglingla sa katawhan, labaw na ang mga inosente, aron iabante ang pulitika sa pipila nga gidapigan ug kaugalingong hipokritong impluwensiya.

Labing hilas ang pagpakaaron-ingnon nga hinlo apan alagad sa duwa nga hugaw.

Laing klasikong ehemplo sa kairesponsable ug lipatlipat ang estorya nga giingnan kuno ni Pres. Rodrigo Duterte ang kagamhanang probinsiyal sa pag-isplikar sa pugosong paggastog P24 milyones para sa mga sakyanan sa mga sakop sa Sangguniang Panlalawigan (SP).

Way ingon niini nga mando si Duterte ug buhing saksi ang presidente nga wa kini niya buhata.

Ang tinuod ug di tinuis nga estorya mao kini: Dunay wa nagpaila nga nagpadag reklamo sa Citizen’s Complaint Hotline 8888 sa Malacañang batok sa planong pagpalit og mga service vehicles para sa bise gobernador ug 13 ka mga sakop sa SP. (Basaha sa transmittal ang Tinagalog nga reklamo.)

Gialegar sa reklamo nga dili sakto ang planong pagpalit og 14 ka mga sakyanan ning panahon sa pandemya ug itabang na lang sa mga nagkinahanglag kuwarta.

Gikan sa nagtumpi nilang pondo, nanghatag bag kuwarta sa mga naglisud ang mga nagkunsabo sa pagguba sa kagamhanan sa probinsiya?

KUNSABONG REKLAMO

Ang “reklamo” sa complaint hotline gitoohan nga laing buhat ug produkto sa nagkunsabong kampo.

Kini aron magpublikar na usab og negatibong sugilanon sa paglumpag sa liderato ni Gob. Arthur Yap ug Bise Gob. Rene Relampagos.

Ang nagdumala sa complaint hotline ni-transmit sa reklamo ngadto sa rehiyonal nga buhatan sa DILG ug nihangyo niini nga mopada og tubag direkta ngadto sa natungdan. (Basaha ang transmittal: “Kindly send your reply…”)

Ang complaint hotline office igo lang sab nga nipahinumdum sa DILG nga tagdon gyod ang citizen’s concern kay, una sa tanan, mao man kini ang tumong sa 8888 complaint hotline. (Transmittal: “Please be reminded…”)

Asa man ang giingong mando ni Pres. Duterte mismo?

NGANONG LUBAGON MAN GYOD ANG ESTORYA? Why sacrifice truthful and factual information? Aron ilaron ang mga inosenteng wa kakita sa tinuod nga dokumento? Aron sugnoran ang mga tawo og kasilag ngadto sa namunoan sa probinsiya ug makabenepisyo sa donot nga propaganda ang pulitikong gidapigan?

Kadudahan ang pagsigeg dakol ngadto sa Kapitolyo to be fair in governance kon ang nagpunayg atake alagad sa pangintriga, panglingla, di makiangayong buhat. THIS IS MORE THAN DANGEROUS.

Ang transmittal giduso sa DILG Regional Office ngadto sa DILG Provincial Office, nga niduso usab niini ngadto sa buhatan sa gobernador, isip kabahin sa proseso sa pagpasabot ngadto sa nireklamo.

Gisunod sa DILG ug Kapitolyo ang proseso sa pagpatin-aw bisan pag ang DILG Central Office mismo niaprubar na sa vehicle procurement program.

Ang “Authority To Purchase Motor Vehicles” giaprubahan sa National DILG Office pinaagi kang OIC-Undersecretary for Local Government Marlo L. Iringan sa Marso 19, 2021.

Gani, ang DILG authority naglatid og mga kondisyon aron ang vehicle procurement magsubay ug di molapas sa sakto nga mga lagda ug regulasyon sa DILG, DBM ug Akta Republika 9184 nga naila usab nga Government Procurement Reform Act.

Bakak sab ang estorya nga mga SUV (sports utility vehicle) ang paliton kay “pick-up type” ang aprubado sa DILG.

Nasayud usab ang gobernong nasyonal, apil ang DOH ug IATF, nga ang kagamhanan sa Bohol wa nagpasagad sa paggahin og dagkong pondo sa daghang pagresponde sa COVID-19 sukad sa unang adlaw sa kagaw.

HILOM MAN LAGI

Daghan ang natingala nga ang mga kunohay “tigpanalipod sa katungod sa katawhan” wa nisaway sa kongresistang nagpaukyab nga mogastog gatosang milyones para sa mga covered court sa Segundo Distrito ning tuiga.

Ang grupo ug kakunsabo ning maong pulitiko ang nagsigeg intriga ug guba sa probinsiya kay molansar sa pagkagobernador.

Ang iyang media ug propagandista hilabihan ka-busy sa pagsigeg pospos sa Kapitolyo imbes moalayon sa pagkig-asdang sa probinsiya sa mga hagit sa pandemya.

Nganong wa may nireklamo sa iyang plano aron ang higanteng pondo para sa mga covered court—atup-atup nga tapokanan sa mga tawo—ihatag na lang sa mga pobre o ilibre sa PCR test sa iyang distrito taliwa sa pandemya?

Gawas lang tingali kon nasugdan kaniadto ug naprograma nang tiwason, ang paggastog milyones matag covered court mas di prayoridad karon nga gidili ang panagtapok tungod sa COVID—nga kon kanus-a molayas gikan kanato ang tigmo ray nasayud. (Ref: Ven Rebo Arigo FB Page)