Kinuwanggol nga Balita sa Bohol Chronicle Nabulgar

Gisuwat ni Ven Rebo Arigo: USA SA AKONG BELIBAN NI PRES. RODRIGO DUTERTE mao nga di siya gustong idahig sa binuang nga estorya nga wa niya buhata.

Kon wa kay kahadlok sa pag-angin sa malditong presidente sa malisyosong estorya, sayon ra pod nimong duwa-duwaan ang panabot sa publiko nga imong gikamenosan—kansang utok gusto nimong hiloan, kondisyonon, tuwerkahon.

Bisan pag ang Citizen’s Complaint Hotline gimugna sa iyang administrasyon ug ubos sa iyang buhatan, di ug wa si Duterte nag-ingon sa Kapitolyo nga tubaga ang reklamo sa plano pagpalit og mga sakyanan.

Kini klaro kaayo sa opisyal nga dokumento sa transmittal gikan sa buhatan sa complaint hotline ngadto sa DILG Regional Office nga naghangyo sa pagtagad sa maong concern.

Matud ni Bise Gob. Rene Relampagos sa interbyu sa DYTR program nga gidumala sa usa sa mga haligi sa local media nga si Ardy Araneta-Batoy, “malisyoso ug gituis” ang balita sa DYRD/Bohol Chronicle.

Sa ilang balita ganihang buntag, pugos nga gibarugan sa DYRD/Chronicle nga si Duterte kuno ang nag-ingon nga paisplikaron ang kagamhanang probinsiyal.

Rason sa DYRD/Chronicle: Kay ang hotline office ubos man sa Office of the President—ug usa ray presidente nga mao si Duterte.

Apan dili gani ang Office of the President maoy direktang nagdumala sa complaint hotline kay kini gidumala og laing sangang buhatan nga gitahasan niini.

Ang malisyoso ug linubag nga estorya gipistahan pod sa mga kritiko ug tig-atake sa probinsiya pinaagi sa social media.

Gustong ilaron sa mga kritiko ang mga tawo nga kunohay wa kauyon, nasuko ug gikasab-an sa presidente mismo ang Kapitolyo.

Nagkita ug nag-uban si Duterte ug Gob. Arthur Yap sa usa ka rehiyonal nga tigom sa Dumaguete City sa mga niaging adlaw.

Way kalibotan ang presidente nga dinhi sa Bohol gidamay sa mga hawod ug iresponsable ang iyang ngan ug katungdanan aron sigehag guba ang lideratong Yap-Relampagos.

Prangkang nidugang si Relampagos sa interbyu sa DYTR:

“Ang problema aning ubang news outlet kay usahay ma-question nato ang objectivity. Is it really for the truth? Or naay nagpaluyo niini? Unfortunately, og tan-awon nimo ning Bohol Chronicle ug DYRD, mongan na lamang ko, di na lang ko maghipokrito. Og mga balita galing nga makadaot sa administrasyon ni Gov. Art Yap, siguro gyod nang tapot. Og matuis pa, samot dugangan. Pero kon balita nga maayo, makahatag og kaayohan sa katawhan, mga programa, gahi na nga motapot anang ilang balita. Mga balita gani nga makapahumot ni Aris Aumentado, automatic tapot gyod na.”