Walay Anomaliya Nakita Ang COA; Igo Lang Kining Nangutana

BY VEN REBO ARIGO

Sa Audit Observation Memorandum (AOM) niini, ang Commission on Audit (COA) igo lang nga nangutana sa presyo, matud ni Governor Art Yap.

Kini gitubag ug gipasabot na pod sa kagamhanan sa lalawigan agad sa tukmang proseso.

Regyular ang audit observation kada tuig ug ang finding niini nasinati usab sa ubang mga LGU di lang sa Bohol apan nasud.

Sa pagkaylap gyod sa COVID -19 sa 2020, nagnihit bisan ang alcohol kay nagpanik ang katawhan

Mga supplier ang nagdiktar sa presyo ug hasta ang mga online retail sa facemask ug face shield makalipong.

Apan ang mga naandang tig-atake sa Kapitolyo nagbalita og lubag.

Ang probinsiya ray gitirahan kay kabahin sa nagpadayon nilang pagdaot sa gobernador.

Tungod sa di ordinaryong demand sa COVID-19 personal protective equipment, medisina ug uban pa, nagpahimus usab sa presyo ang mga supplier sa nasud.

Dili ikakumparar karon ang kaniadto ug ang record nagmatuod nga gisunod gihapon ang mga lagda sa procurement taliwa sa emerhensiya, matud sa gobernador.

Masabot ang pag-audit sa kagastohan sa nagkalainlaing yunit ug buhatan sa kagamhanan kay kini ang mandato sa COA, matud ni Yap.

Apan ang dili masabtan mao nga samtang igo lang nga nangutana ang COA aron mapasabot, ang mga tigdaot ug kakunsabong media diretsong nangintriga nga dunay overprice.

Nganong dili man nila ibalita ug pasanginlan ang tanang LGU nga namalit sa mahal nga presyo sa niaging tuig kay naa man pod silay COA observation?

Sama sa nabatasan, ang gobernador ug Kapitolyo ray ilang ihulagway nga panuway aron ang pulitikong ilang gikugos molutaw nga numero dos nga diyos.