NING bag-o lang gibisita ni Jaja Jumamoy, representante ni Gov. Art Yap, ang Sagbayan diin gipaambit sa kanhi Board Member sa Segundo Distrito ang maayong mga talamdanan mahitungod sa pagpalambo sa panginabuhian sa mga lumulupyo sa maong lungsod.
Tumong niini nga labi pang mapakunhod ang kawad-on sa katawhan. Kini alayon usab sa padayon nga pagpanerbisyo sa ahensiya sa National Anti-Poverty Commission (NAPC), isip instrumento nga makadugtong ang 25 ka nasyonal nga mga ahensiya ug sa mga kapunongan sa kabarangayan nga mahatagan og igong ayuda.
Sa milabayng katuigan hangtod karon, padayon nga nagasuporta si Gov. Art Yap sa katawhan sa Segundo Distrito, ilabina sa lungsod sa Sagbayan, aron makaangkon og kapanginabuhian nga makaalibyo sa ilang kalisod.
Nakita ni Jaja kon unsa kamalipayon ang iyang mga ka-distrito sa lungsod sa Sagbayan sa malamposong programa sa NPAC, nga maoy naggiya ug misuporta nila aron makaangkon sa gipangandoy nga pangibuhian ug makaangat sa ilang kahimtang.
Sa maong okasyon, dako usab ang pagpasalamat sa katawhan nila ni Gov. Art Yap, Vice Gov. Rene Relampagos, NAPC-Bohol Team Community Organizers/Facilitators pinangunahan ni Carmelita Limbario, BM Mimi Boniel ug Mayor Junjun Suarez, sa ilang walay hunong nga pagsuporta aron mahimong magmalamposon ug magmalungtaron ang panginabuhian sa mga nagkalisod nga katawhan sa Sagbayan.
“Matag usa kanato adunay pangandoy, dili lamang alang sa atong kaugalingon kondili alang usab sa atong pamilya ug komunidad. Ug sa matag-adlaw, kita nagalaom nga makaangkon og lamdag nga kaugmaon. Ang kawad-on mabuntog ra nato kon hingpit nato nga tinguhaon,” maoy panahom ni Jaja Jumamoy.