Gov. Art Yap, Naghatod og Kalipay sa Tulo ka Isla sa Getafe

DILI matukib ang tinud-anayng kalipay nga gibati sa katawhan sa tulo ka isla sa lungsod sa Getafe nga gibisita sa kagamhanang probinsiyal pinangulohan ni Gov. Art Yap diin gihatdan sila sa nagkadaiyang serbisyo ug ayuda, di pa lang dugay.

Giapud-apod sa halangdong gobernador ang mga food pack ngadto sa katawhan sa Barangay Jandayan Sur, diin gitunol usab ang mga tseka alang sa mga Barangay Livestock Aide. Sa laing bahin, gihatagan usab sa kugihang amahan sa lalawigan og pinansiyal nga ayuda ang Barangay Jandayan Norte.

Dugang niini, gibisita usab ni Gov. Yap ang Barangay Handumon aron kahatagan og serbisyo gikan sa nagkalainlaing ahensiya sa kagamhanang probinsiyal. Gitunol usab niya ang tseke alang sa ilang proyekto sa panubig apil na ang honorarium sa mga Barangay Livestock Aid ug Day Care Worker.

Ang pagbisita ug pagpanghatag ni Gov. Art Yap og mga ayuda sa tulo ka barangay sa Getafe giabagan usab nila ni kanhi BM Aga Avenido ug Jaja Jumamoy.

“Bisan pa sa daklit nga panahon nga nakauban si Gov. Art Yap, nalipay ug nahinangop kaayo ang katawhan sa tulo ka isla sa Getafe. Kay nabati ug nakita nila ang maayong mga plano ug damgo sa gobernador alang sa katawhan. Ug ang dakong pagpaningkamot sa maalagarong namunoan sa lalawigan mituhop sa matag usa nila ka kasingkasing,” pu’ng ni Jaja Jumamoy.