gisuwat ni Ven C. Arigo
Ang programa ni Governor Arthur Yap gihimong modelo ni Department of Agriculture (DA) Sec. William Dar para sa Province-led Agriculture and Fisheries Extension Systems (PAFES) sa mga lalawigan sa nasud.
Sa iyang memorandum niadtong Lunes, gimandoan sa kalihim ang tanan niyang rehiyonal direktor sa DA sa pagsunod o paghimong sumbanan sa gitawag niyag “Bohol model” sa pagpatuman sa PAFES.
Ang PAFES usa sa mga nag-unang estratehiya sa DA ubos sa “OneDA Reform Agenda” nga gitumong sa pagsibo sa lokal ug nasyonal nga mga prayoridad nga plano ug programa sa agrikultura ug pangisda.
Inisyal nga gipatuman sa DA ang PAFES sa usa lang ka pilot province sa matag rehiyon o 16 ka mga probinsiya sa 16 ka mga rehiyon sa tibuok nasud.
Ang Negros Oriental mao ra untay probinsiya sa Central Visayas o Rehiyon 7 diin kasamtangang gisuwayag patuman sa DA ang PAFES program.
Apan kalit nga nihukom ang kalihim sa agrikultura sa pag-apil sa Bohol human niya nasaksihi ang presentasyon ni Yap sa mga programa ug proyekto sa probinsiya niadtong Biyernes.
Kini atol sa pagbisita ni Dar sa Kapitolyo aron pangunahan ang pagtugyan ngadto sa gobernador sa mga makinarya, proyekto ug ayuda sa panguma ug pangisda nga nikabat og P387 milyones.
Niadtong Lunes o tulo ka adlaw human sa iyang pagbisita, gipagawas ni Dar ang memorandum sa paghimo sa programa sa Bohol nga modelo sa pagpatuman sa PAFES sa nasud.
Matud sa kalihim, ang mga programa sa Bohol nga gipresentar ni Yap usa sa labing maayo nga iyang nakita.
Kini mitukma sa national reform agenda sa DA ug mga estratehiya sa departamento bisag wa pa gani maapil ang Bohol sa PAFES.
Giila usab ang suporta ni Bise Gob. Rene Relampagos, sa Sangguniang Panlalawigan, Office of the Provincial Agriculturist, Office of the Provincial Veterinarian ug uban pang buhatan—ingon man ang kanunayng pag-alayon ni Kong. Edgar Chatto—sa kaayohan sa lalawigan.
