“Unta daghang Art Yap sa nasud” – DA Secretary

Report ni VEN Rebo Arigo: Gidayeg ni Department of Agriculture (DA)
Sec. William Dar ang mga programa ug proyekto sa agrikultura sa Bohol ubos ni Gob. Arthur Yap.

Gipasalig sa kalihim ang dugang nga suporta samtang hingpit usab ang pagpaluyo sa Sangguniang Panlalawigan pinangulohan ni Bise Gob. Rene Relampagos.

Uban nga nagkugi sa mga programa ang Office of the Provincial Agriculture, Office of the Provincial Veterinarian ug ubang esensiyal nga buhatan sa probinsiya.

Gipresentar ni Yap ang mga programa ug proyekto atol sa pagtugyan ni Dar sa P387 milyones nga makinarya sa panguma, refrigerated dairy van, ubang kahimanan ug tabang sa agri-fishery, ayuda sa virgin coconut oil processing ug daghan pang suporta didto sa Kapitolyo niadtong Biyernes.

Nangandoy si Dar nga dunay daghang Gob. Arthur Yap sa nasud.

Tungod sa katakus ug kakugi ni Yap ug kaubanan sa probinsiya, dihadiha nga giapil sa kalihim ang Bohol sa programa sa DA nga Province-led Agriculture and Fisheries Extension Service (PAFES).

Nadani si Dar sa agresibong panglantaw ni Yap di lang sa kaugmaran sa agrikultura apan sa kinatibuk-ang industriya sa produksyon sa pagkaon.

“I am happy to say that with a governor like Art, may direksiyon ang Bohol lalo na sa sektor ng agrikultura,” matud sa kalihim.

Ang naglalain-laing farm equipment nga gi-turn over dakog ikatabang sa pagpakunhod sa gasto gikan sa pagtikad sa uma ngadto sa pag-ani samtang mopausbaw sa abot o produksyon.

Menos ang gugma o kadasig sa batan-ong sektor sa panguma gumikan sa kahago sa pagtikad nga kabaw ray saligan kay way makinarya sama sa traktor.

Gikalipay ni Dar ang pag-alayon sa DA ug kagamhanan sa Bohol samtang iyang gipasalig ang dugang nga mga pondo.

Matud niya, duna gyoy pag-abante kon ang nagtambayayong sama og tumong sa pagsiguro sa pagkaon.

Nitambong usab sa turnover sila si PhilMech Exec. Dir. Baldwin Jallorina ug DA-7 Dir. Salvador Diputado.