Breaking
Sun. May 19th, 2024

Ayaw Liboga ang Katawhan Kabahin sa Bakuna, Awhag ni Dr. Macuno

Ultra-cold storage facility sa Gallares Hospital nga butangan sa mga Covid vaccine nga ginama sa Pfizer.

Reported by Ven Rebo Arigo: NIAWHAG ang hepe sa Gov. Celestino Gallares Memorial Hospital (GCGMH) nga si Dr. Mutya Kismet Tirol-Macuno nga dili libogon ang mga tawo kalabot sa programa sa bakuna batok sa COVID-19.

Matud ni Macuno, ang nag-unang tahas mao ang pag-andam sa matag-usa nga mabakunahan sa unsa mang vaccine nga moabot ug anaa.

Adunay freezer ang GCGMH nga puwedeng butangan og Pfizer vaccine, nagkanayon ang doktor, ug kini giklaro usab ni Gob. Arthur Yap.

Apan wa lang naapil ang Bohol sa mga dapit alang sa dinaliang prayoridad sa nasudnong kagamhanan sa paghatag sa maong bakuna.

Gisiguro sa IATF ug DOH ang National Capital Region ug palibot niini (NCR plus) ug mga syudad sa Cebu ug Davao.

Gikonsiderar sa nasudnong kagamhanan ang kadaghan sa mga kaso sa COVID didto ug ang gikinahanglang ultra-cold storage facility sa mga natungdang LGU.

Andam ang lalawigan sa Bohol alang sa pagdawat sa Pfizer vaccines para sa Covid-19.

Ang kagamhanang probinsiyal sa Bohol wala niining maong pasilidad kay ang anaa mao ang cold storage nga para lang sa ubang COVID vaccine—ug ang containerized RT-PCR laboratory.

Gani, ang lahi nga mga matang sa vaccines nga nadawat na sa Bohol didto diretso gihatud sa cold storage sa probinsiya.

Apan dili sama sa ubang bakuna, ang Pfizer nagkinahanglan og ultra-cold storage nga labing menos negative 70 degrees Celsius aron dili maapektohan ang kalidad ug mausik lamang.

Ang Gallares Hospital nga gipanag-iya sa kagamhanang nasyonal pinaagi sa DOH adunay ultra-low freezer nga mabutangan og bakuna nga sama sa Pfizer—apan wa pa pod iapil sa suplay.

Bisag ang cold storage sa probinsiya para lang sa ubang bakuna, apil ang gobernador nga niklaro nga ang GCGMH adunay freezer nga puwedeng gamiton para sa Pfizer.

Gani, ang probinsiya pinaagi sa BIATF ug mga doktor, apil si Macuno, nagkasabot nga gamiton ang freezer sa GCGMH kon adunay Pfizer vaccine nga ipada ang DOH/IATF sa Bohol.

Team convergence lang na, panagsabot, kay maprobinsiya o ma-Gallares Hospital ang ekipo iya man gihapon sa kagamhanan ug para sa kaayohan sa katawhan, matud ni BIATF spokesperson Dr. Yul Lopez.

Nasayud ang DOH sa freezer sa GCGMH kay ang maong tambalanan iya sa nasudnong goberno pinaagi sa DOH mismo.

Apan sama sa daghang dapit sa nasud, wa pa iapil ang Bohol sa inisyal nga Pfizer vaccine kay giprayoridad sa DOH ug IATF ang NCR plus, Cebu City ug Davao City.

Dugang pagklaro ni Macuno nga ang distribusyon sa bakuna nag-agad sa kriterya sa ibabaw (DOH/IATF) ug dili ni bisan kinsa na lang ug kini ilang girespetohan.

Ang tinuod mao nga andam ang ultra-low freezer kon gikinahanglan, matud ni Macuno kinsa nag-alayon og ang gobernador ug BIATF sa pagresponde sukad pag-COVID sa niaging tuig.

Nagtoo ang hepe sa bugtong tambalanan sa Bohol nga COVID-dedicated facility nga ang pagbakuna mao ray paagi nga mabuntog ang pandemya.

Related Post

Leave a Reply